រាជធានីភ្នំពេញ៖ នាថ្ងៃទី២២ ខែមេសា ឆ្នាំ២០២៦ រដ្ឋមន្ត្រីក្រសួងការបរទេសចិន លោក វ៉ាង យី និងរដ្ឋមន្ត្រីក្រសួងការពារជាតិចិន លោក តុង ជុន បានអញ្ជើញធ្វើជាសហប្រធាននៃកិច្ចប្រជុំលើកទី១ ស្ដីពីយន្តការកិច្ចសន្ទនាយុទ្ធសាស្ត្រ២+២ ជាមួយរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន និងរដ្ឋមន្ត្រីក្រសួងការពារជាតិកម្ពុជា លោក ទៀ សីហា នៅវេលាម៉ោង៦៖០០នាទី ល្ងាចថ្ងៃទី២២ ខែមេសា នេះ។
យន្តការកិច្ចសន្ទនាយុទ្ធសាស្ត្រ២+២ ត្រូវបានបង្កើតឡើង ក្នុងគោលបំណងជំរុញទំនាក់ទំនងយុទ្ធសាស្ត្រកម្រិតខ្ពស់ ធ្វើឱ្យស៊ីជម្រៅនូវទំនុកចិត្តផ្នែកនយោបាយ និងសន្តិសុខ និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។ យន្តការថ្មីនេះ គឺជាវេទិកាដ៏សំខាន់មួយសម្រាប់ការផ្លាស់ប្តូរទស្សនៈលើបញ្ហាតំបន់ និងអន្តរជាតិដើម្បីផលប្រយោជន៍រួម។ យន្តការនេះ កើតចេញពីដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោក ស៊ី ជីនពីង នៅកម្ពុជា កាលពីខែមេសា ឆ្នាំ២០២៥។
